12 DI OCTOBER TIN CONGRESO ARTE DI TARIMA DEN CAS DI CULTURA

Cas di Cultura y Departamento di Cultura Aruba conhuntamente ta celebra 100 aña di servicio cultural pa Aruba. Pa pone atencion riba esaki e instituto culturalnan aki ta organisa tanto cu congreso dia 12 di october y un concierto di gala dia 13 di october.

E congreso di ful dia, esta CONGRESO ARTE DI TARIMA, ta conta cu 11 orado profesional, den diferente ramo di arte, di gerencia pa docente te cu artista, tanto local como internacional, cu lo conta con nan ta anda cu nan ramo di arte y cultura y con esaki ta beneficia nan comunidad, tanto riba e area social, educativo, economico, creativo y comunitario. Mas cu tur cos den nos bida y situacion actual na Aruba, arte por ta un herment poderoso pa haci nos comunidad uno mas sano. Pues e potencial di esaki mester wordo explora y uza. E dia lo tin hopi aliento y lo ta en general un dia agradabel, dunando hopi inspiracion. E ta pa tur persona interesa den arte y cultura, tanto cu ta practica activamente, pasivamente, docentenan, amateur, profesional y esnan trando tambe den e ramonan social.

E CONCIERTO DI GALA dia 13 di oktober lo inclui al rededor di 45 artista y musico local cu ta ancioso pa presenta pa publico den esfera diferente cu custumber. E siere di e concierto ta den man di srta. Imara Thomas, soprano di opera Hulandes cu sanger Arubiano, trahando na Opera House na Dusseldorf. Imara ta gusta combina e genero clasico cu e genero pop, pues por spera un show di dje cu ta hopi varia. Despues di e concierto tin un momento placentero den cura cu un agrupacion musical y DJ.
Cas di Cultura y Departamento di Cultura inmensamente gradicido na UNOCA, Prins Bernhard Cultuurfonds Caribisch Gebied, Vertegenwoordiging van Nederland op Aruba, Elite Productions, Subway, High Performance y Smit& Dorlas pa apoya e evenementonan aki y ta invita Aruba completo, amantenan di arte, cultura, positivismo y inovacion pa presencia e eventonan aki cu a ser formula y organisa cu hopi amor y dedicacion. Registracion (cumpra carchi) ta habri caba via Facebook di e dos instancianan, na Cas di Cultura y na Superfood. Pa mas informacion of registracion via telefon por yama 582-1010.

Leave a Reply

Your email address will not be published. Required fields are marked *